kavitha

ക്ഷേത്രാങ്കണം

അരുണിമ കൃഷ്ണന്‍ 2017-12-14 04:34:21pm

ചുറ്റും വിളക്കുകള്‍ മറയാതെ
നില്‍ക്കവേ മുന്നില്‍ വരുന്നതിന്നോര്‍മ്മകളോ?
കൂരിരുള്‍ തെല്ലൊന്നുണര്‍ന്നു വരുകിലും
കാണുന്നു ഞാനുമാ ക്ഷേത്രാങ്കണം
എരിയുന്ന തിരിയുടെ ശ്രീയുമായ് നില്‍ക്കുന്നു
നറുമണം ചീന്തുന്ന കല്‍വിളക്കും
മധുമന്ദഹാസമുതിര്‍ത്തു നിന്നാടുന്നു
കാലം കുറിക്കുന്നോരോട്ടുമണി
കുറുകിപ്പറക്കുന്നു പിന്നെയും കുറുകുന്നു
അധികാരമേന്തിടും വെണ്‍പിറാക്കള്‍
കാത്തിരിക്കുന്നുണ്ടു നേദ്യഹവിസ്സിനായ്
തപസ്സനുഷ്ഠിക്കും ബലിക്കല്ലുകള്‍
മോക്ഷവാതായനം കാത്തുകിടക്കുന്നു
മുറ്റത്തിലങ്ങിങ്ങു മണ്‍തരികള്‍
ഈറനതേറെയായെങ്കിലും പിന്നെയും
ഈറനണിഞ്ഞിടും കല്‍പ്പടവും,
സ്വച്ഛസമീരനെ നെഞ്ചേറ്റിലാളിച്ചു
സ്വച്ഛമായ് നിന്നിടും വൃക്ഷരാജന്‍
കനിവിന്റെ മാധുര്യം വര്‍ഷമായ് ചൊരിയട്ടെ
സ്വച്ഛയായ് നില്‍ക്കട്ടെ ക്ഷേത്രാങ്കണം !


OUR SUPPORTERS
* VINCENTÉ JEWELERS   * CEMAT AUTO SERVICES   * BOOK O TRIP   * LAKELAND CRUISE   * KERALA HOUSEBOAT   * FAMILY DENTAL CARE   * VINCENT CYRIAC   * EAST COAST CAPITAL   * CROSS ISLAND REALTYONE INC.   * PROFESSIONAL ACCOUNTING    * GREENPOINT TRAVEL   * KERALA KITCHEN